Netöryggiskeppni Íslands, Gagnaglíman, er árlegur viðburður sem haldinn er af frumkvæði háskóla-, iðnaðar- og nýsköpunarráðuneytisins. Markmið keppninnar er að efla áhuga íslenskra ungmenna á netöryggi og auka þekkingu og færni þeirra sem sýna því áhuga. Þar að auki þjónar keppnin því hlutverki að vera forkeppni Íslands fyrir Netöryggiskeppni Evrópu, European Cyber Security Challenge (ECSC). Markmið ECSC er að vekja áhuga á netöryggi um alla Evrópu.

Það þarf ekki að liggja lengi yfir fréttamiðlum samtímans til að átta sig á mikilvægi tölvuöryggis í nútímasamfélagi. Reglulega birtast fréttir af fyrirtækjum og einstaklingum verða af háum fjárhæðum vegna netárása og jafnvel tölvuinnbrot framkvæmd af ríkjum með það að markmiði að njósna um önnur ríki.

Þrátt fyrir mikilvægi netöryggis, þá skortir ennþá hæfileikaríkt fólk til að takast á við þær áskoranir sem því fylgja. Af þessari ástæðu setti Netöryggisstofnun Evrópu, ENISA, á laggirnar Netöryggiskeppni Evrópu. Markmið keppninnar er að hvetja ungt fólk til að kynna sér netöryggi og jafnframt hvetja ungt fólk til að íhuga að leggja netöryggi fyrir sig að atvinnu.

Um keppnina

Markmið keppninnar er að velja 10 manna lið til að taka þátt í ECSC 2022 fyrir Íslands hönd. Samkvæmt reglum ECSC verða keppendur að vera 25 ára eða yngri (fædd 1997 eða seinna). Netöryggiskeppnin fer fram í tveimur hlutum. Tveggja vikna forkeppni fer fram á Netinu í lok mars og er opin öllum. Þeir keppendur sem standa sig best í forkeppninni, öðlast þáttökurétt í landskeppninni, sem haldin verður í maí. Frammistaða keppenda í landskeppninni verður svo lögð til grundvallar þess að velja 10 manna hóp til að taka þátt í ECSC 2022 sem haldin verður í september í Vínarborg, Austurríki.

Bæði forkeppnin og landskeppnin verða hefðbundnar jeopardy style CTF (capture the flag) keppnir.

En ég hef enga reynslu af netöryggi og CTF, er þessi keppni fyrir mig?

Ef svo er, þá ertu í sömu sporum og flestir aðrir og það er allt í lagi. Það er eins með netöryggi og flest annað, það þarf bara áhuga og þolinmæði til að öðlast færnina. Þannig ef þú ert forvitin(n), þá er gott að byrja hér.

Hvað er að gerast núna?

Landskeppninni lokið #

Landskeppnin fór fram 25. maí samhliða UTmessunni. Alls tóku 18 þátt í keppninni og glímdu þau við 14 verkefni í 8 klukkustundir. Keppnin reyndist æsispennandi og réðust úrslit ekki fyrr en undir blálokin.

Nánari upplýsingar um keppnina má finna hér.

Framkvæmd keppninnar

11. mar - 27. mar

Forkeppni

Forkeppnin er haldin á Netinu og er opin öllum!

Þeim keppendum sem standa sig best í forkeppninni (og hafa keppnisrétt) verður boðið að taka þátt í landskeppninni.

25. maí

Landskeppni

Keppnin er 8 klst og verður haldin á UTmessunni.

Þeir keppendur sem standa sig best í landskeppninni verða valdir í keppnishóp Íslands fyrir ECSC.

1. jún - 1. sep

Æfingar keppnishóps

Reglulegar æfingar verða haldnar fyrir keppnishópinn.

12. sep - 17. sep

Netöryggiskeppni Evrópu (ECSC)

Lið frá rúmlega 20 Evrópulöndum etja kappi í Netöryggiskeppni Evrópu, sem haldin verður í Vínarborg, Austurríki, að þessu sinni.

Þjálfarar velja 10 einstaklinga úr keppnishópnum til að taka þátt fyrir Íslands hönd.